एमालेसँगको गठबन्धनबाट पाठ सिकेँ : प्रचण्ड

माओवादी केन्द्रका अध्यक्ष पुष्पकमल दाहाल प्रचण्डले माओवादी र कांग्रेसको गठबन्धन प्राकृतिक गठबन्धन भएको बताएका छन् । गोरखा सदरमुकामस्थित कांग्रेस पार्टी कार्यालयमा शनिबार आयोजित परिचयात्मक तथा अगुवा कार्यकर्ता अभिमुखीकरण कार्यक्रममा उनले वाम गठबन्धनबाट सिकेर कांग्रेससँग गठबन्धन गरेको बताए ।

‘हामीले राजनीतिक स्थायित्वका लागि वाम गठबन्धन गरियो । विकास र समृद्धि गर्ने भनेर पार्टी एकता गरियो, तर तीन वर्ष नपुग्दै भताभुंग भयो,’ उनले भने, ‘उल्टै पार्टीभित्रैबाट निरंकुशता, छलकपट, बेइमानी देखियो । त्यसैले कांग्रेस, माओवादी र अन्य लोकतन्त्रवादी पार्टी र वामपन्थी पार्टीको गठबन्धन नै प्राकृतिक गठबन्धन हो ।’