इरानमाथि वैश्विक प्रतिबन्ध लगाउने अमेरिकी प्रस्तावमा चीन र रुसद्वारा भिटो प्रयोग

न्युयोर्क। इरानमाथि पुनः लागु गरिएका संयुक्त राष्ट्रसंघीय प्रतिबन्धको निगरानीका लागि विज्ञहरूको प्यानललाई निरन्तरता दिने अमेरिकी प्रस्तावमा रुस र चीनले भिटो प्रयोग गरेका छन्। संयुक्त राष्ट्रसंघ सुरक्षा परिषद्मा बिहीबार भएको मतदानमा प्रस्तावको पक्षमा ११ सदस्यले मतदान गरे पनि रुस र चीनले विपक्षमा मतदान गरे । सोमालिया र पाकिस्तान भने मतदानमा सहभागी भएनन् । रुस र चीनको भिटोका कारण अमेरिकी प्रस्ताव पारित हुन सकेन ।

इरानमाथि लागू प्रतिबन्धअन्तर्गत विदेशमा रहेको इरानी सम्पत्ति रोक्का गर्ने, इरानसँग हतियारको खरिद–बिक्रीमा प्रतिबन्ध लगाउने तथा उसको ब्यालिस्टिक मिसाइल कार्यक्रमको विकासमा रोक लगाउनेलगायतका व्यवस्था छन्। सन् २०१५ मा इरान र विश्वका प्रमुख शक्तिबीच भएको आणविक सम्झौतामा रहेको ‘स्न्यापब्याक’ प्रावधान प्रयोग गर्दै फ्रान्स, जर्मनी र बेलायतले प्रतिबन्ध पुनः लागू गर्ने प्रक्रिया अघि बढाएका थिए। त्यसपछि २७ सेप्टेम्बर २०२५ मा सुरक्षा परिषद्बाट इरानसम्बन्धी प्रतिबन्ध पुनः लागू भएका थिए।