पनौतीदेखि तेमालसम्म बुद्ध–सर्किट : धार्मिक पर्यटनसँगै नयाँ गन्तव्यको खोजी

काठमाडौं । काभ्रेपलाञ्चोकको दक्षिण–पूर्वी भूभागमा रहेका पनौती, नमोबुद्ध र तेमाल अब छुट्टाछुट्टै धार्मिक तथा सांस्कृतिक गन्तव्यका रूपमा मात्र सीमित नरहने भएका छन्। यी तीन क्षेत्रलाई एउटै पर्यटन मार्गमा जोडेर ‘बुद्ध–सर्किट’ विकास गर्ने योजना अघि बढेसँगै काभ्रेको पर्यटन नक्सामा नयाँ गन्तव्य थपिने सम्भावना बढेको छ।

ऐतिहासिक पनौतीदेखि बौद्ध धर्मावलम्बीको महत्वपूर्ण तीर्थस्थल नमोबुद्ध हुँदै तेमालसम्म पुग्ने यो परिपथले धार्मिक पर्यटनसँगै संस्कृति, इतिहास, पदयात्रा, प्रकृति र स्थानीय जीवनशैलीलाई एउटै पर्यटन उत्पादनका रूपमा जोड्ने लक्ष्य लिएको छ।