बक्स अफिसमा ‘मितज्यू’ उकालो लाग्दा ‘काजी’ खस्कियो

काठमाडौं । पछिल्लो चार हप्ता यता प्रदर्शनमा आएका नेपाली चलचित्रहरूमा अन्ततः ‘लालीबजार’ले सफलता हासिल गरेको छ । अघिल्लो शुक्रवार रिलिज भएको दुई चलचित्र ‘काजी’ र ‘मितज्यू’को पहिलो साताबाट व्यापार हेर्दा ‘काजी’ भन्दा ‘मितज्यू’ दोब्बरले माथि छ ।

चलचित्र विकास बोर्डले सोमबार सार्वजनिक गरेको १६ जेठ शनिवार रातीसम्मको व्यापारिक विवरण अनुसार रिलिज भएको ९ दिनमा अभिनेता दयाहाङ राई र सौगात मल्लको चलचित्र ‘मितज्यू’ले १ करोड २० लाख ५९ हजार ८२ रुपैयाँको व्यापार नेपालबाट गरेको छ । ९ दिनमा बक्स अफिसमा यो चलचित्रको ४१ हजार २४८ वटा टिकट बिक्री भएका तथ्यांकमा उल्लेख छ ।