आर्सनलको गति कायमै, लिभरपुललाई पछ्याउँदै

काठमाडौं । इंग्लिश प्रिमियर लिगमा आर्सनलले आफ्नो गति कायमै राखेको छ । आर्सनलले बुधबार राती ब्रेन्टफोर्डलाई ३-१ ले हरायो । अवे मैदानमा आर्सनललाई जिताउन गाब्रियल जिसस, माइकल मेरिनो र गाब्रियल मार्टिनेलीले एक-एक गोल गरे ।

ब्रेन्टफोर्डका लागि सुरुवात मै ब्रायन मबेउमोले गोल गरेका थिए । प्रिमियर लिगका पछिल्ला खेलमा शीर्ष क्लबहरुले गति गुमाएका बेला आर्सनले भने आफ्नो गतिलाई कायमै राखेको हो । म्यान्चेस्टर सिटीले हालसम्म ६ खेल, म्यान्चेस्टर युनाइटेड, टोटनह्यामले ९ खेल गुमाइसक्दा आर्सनलले शीर्ष स्थानको लिभरपुललाई पछ्याइरहेको छ । शीर्षस्थानको लिभरपुलले हालसम्म १ खेल गुमाउँदा आर्सनलले २ खेल गुमाएको छ भने अंक तालिकामा पनि दोस्रो स्थानमा कायम छ ।