‘अभिनयको भोक यति धेरै थियो कि जिद्दी गरेरै बेलायतबाट नेपाल फर्किएँ’

काठमाडौँ । प्रियाना आचार्य लाई वास्तविक नामले भन्दा हास्य टेलिसिरियल ‘सक्किगो नि’की ‘मुन्नी’ पात्रको नामले धेरैले चिन्छन् । बाल्यकालमै चितवनस्थित नारायणी कला मन्दिरबाट नृत्य, सङ्गीत र अभिनयको औपचारिक जग बसालेकी उनले बालकलाकारको रुपमा ‘नाइँ नभन्नु ल’, ‘निगरानी’ र ‘मन पर्‍यो मलाई’ जस्ता फिल्ममा पनि काम गरेकी थिइन् ।

अध्ययनको सिलसिलामा बेलायत गएपछि भने उनको अभिनयमा ब्रेक लाग्यो । पछि बेलायतै ‘प्लान यूके’ जस्ता च्यारिटी विज्ञापन र फिल्ममा कोरस कलाकारको रूपमा काम गर्ने अवसर पाइन् । जसले उनलाई फेरि कलाकारिताको भोक जगाइदियो । अभिनयको भोक मेटाउनकै लागि उनी बेलायतको सहज र सुरक्षित भविष्य त्यागेर नेपाल फर्किइन् ।