दिल्लीस्थित नेपाली दूतावासको लापर्बाही: अर्थमन्त्रीस्तरीय भेटमा नेपालको झण्डा नराखेकोमा ज्ञानेन्द्र शाहीको कडा आक्रोश

काठमाडौँ। नयाँ दिल्लीस्थित नेपाली राजदूतावासको गम्भीर कूटनीतिक कमजोरी र लापर्बाही फेरि एकपटक छताछुल्ल भएको छ। भारत भ्रमणमा रहेका अर्थमन्त्री डा. स्वर्णिम वाग्ले र उनका भारतीय समकक्षी निर्मला सीतारमणबिच भएको औपचारिक द्विपक्षीय भेटवार्तामा नेपालको राष्ट्रिय झण्डै नराखिएको तथ्य बाहिर आएपछि दिल्लीस्थित दूतावासको भूमिकामाथि प्रश्न उठेको छ।

बिहीवार अपराह्न ५ बजे नयाँ दिल्लीस्थित ‘कर्तव्य भवन’ परिसरमा रहेको भारतीय वित्त मन्त्रालयमा दुवै देशका सरकारी प्रतिनिधिमण्डलका सदस्यहरूको सहभागितामा सो भेटवार्ता भएको थियो। दुई देशका अर्थमन्त्री स्तरको औपचारिक बैठकमा कूटनीतिक मर्यादा र प्रोटोकलअनुसार नेपालको राष्ट्रिय झण्डा अनिवार्य रूपमा राखिनुपर्नेमा त्यसो नगरिनुलाई नेपाली राजदूतावासको गैरजिम्मेवारपनका रूपमा हेरिएको छ।