बालकुमारी पुल नजिकै सिक्री थुतेर भाग्ने युवक प्रहरी नियन्त्रणमा

काठमाडौँ । काठमाडौँको बालकुमारी पुल नजिकैबाट पैदलयात्री महिलाको चाँदीको सिक्री थुतेर भाग्ने एक युवकलाई प्रहरीले सामानसहित पक्राउ गरेको छ।

काठमाडौँ महानगरपालिका-३२ बालकुमारी पुल नजिकैको सडक खण्डमा पैदल हिँडिरहेकी महिलाले घाँटीमा लगाएको चाँदीको सिक्री तानेर भाग्दै गरेको अवस्थामा ती युवक पक्राउ परेका हुन्।

सडकमा महिलाको सिक्री थुतेर भागेको सूचना प्राप्त हुनसाथ प्रहरी प्रभाग कोटेश्वरबाट तत्काल खटिएको प्रहरी टोलीले मुगुको छायाँनाथ रारा नगरपालिका-२ घर भई हाल काठमाडौँ महानगरपालिका-३२ कोटेश्वर बस्ने २३ वर्षीय रेलिन भण्डारीलाई नियन्त्रणमा लिएको हो।

प्रहरीले उनको साथबाट लुटिएको १७.८ ग्राम तौल भएको चाँदीको सिक्री समेत बरामद गरेको छ।

जिल्ला प्रहरी परिसर काठमाडौँका प्रवक्ता एवं सूचना अधिकारी प्रहरी उपरीक्षक पवन कुमार भट्टराईका अनुसार घटना मंगलबार बिहानको समयमा भएको हो। पक्राउ परेका भण्डारीलाई नियन्त्रणमा लिएर थप अनुसन्धानका लागि प्रहरी वृत्त नयाँ बानेश्वर पठाइएको र घटनाबारे विस्तृत अनुसन्धान भइरहेको प्रहरीले जनाएको छ।