प्रधानमन्त्री घोषणा : नायक खोज्ने राजनीति

राजनीतिमा चुनावी बहस तीव्र रूपमा अघि बढिरहेको छ । देश चुनावी सरगर्मीमा प्रवेश गरिसकेको छ । यस पटकको निर्वाचन नीति र कार्यक्रमभन्दा बढी नेतृत्व केन्द्रित हुने स्पष्ट संकेत देखिँदै छ । रास्वपाले बालेन शाहलाई प्रधानमन्त्रीको सम्भावित अनुहारका रूपमा प्रोजेक्ट गर्ने टुंगो छ । एमालेले केपी शर्मा ओलीलाई र नेपाली कांग्रेसले सम्भवतः गगन थापालाई प्रधानमन्त्रीको अनुहार मानेर अगाडि बढ्ने संकेत दिएको छ ।

यसै सन्दर्भमा, अघिल्लो हप्ता नेपाली कांग्रेसभित्र विशेष महाधिवेशनको तयारीका क्रममा तत्कालीन संस्थापन र विशेष पक्षधर समूहबीच सहमति नजुटेको एउटा मुख्य विषय थियो– चुनावमा जाँदा गगनलाई प्रधानमन्त्री घोषणा गर्ने कि नगर्ने ? यसले देखाउँछ– राजनीतिक बहस केवल दलबीच होइन, दलभित्रै पनि ‘प्रधानमन्त्री को बन्छ ?’ भन्ने प्रश्नमा केन्द्रित हुँदै छ ।