‘एनआरएन द सिङ्गर’ मा बेलायतकी यूक्ति विमली विजयी

लन्डन । ‘एनआरएन द सिङ्गर’ २०२३ को उपाधि बेलायतकी युक्ति विमलीले जितेकी छन् । गैरआवासीय नेपाली संघ (एनआरएनए) को संस्कृति तथा सम्पदा समितिको संयोजन र युनिटेक नेपालको व्यवस्थापनमा भएको गायन प्रतियोगिता ‘एनआरएन द सिङ्गर’ मा युक्ति विजयी भएकी हुन् ।

उनले पाँच लाख नगद पुरस्कार, ट्रफी तथा प्रमाणपत्र प्राप्त गरेकी छन् । उनी कार्यक्रममा प्रत्यक्ष रूपमा उपस्थित नभएको हुँदा उनको पुरस्कार गैरआवासीय नेपाली संघ युरोप संयोजक सन्तोष भट्टराईले लिएका छन् । गैर आवासीय नेपाली संघ यूके अध्यक्षमार्फत पुरस्कार विजेतामार्फत पुर्‍याउने भट्टराईले जनाए । 'विदेशमा बसेर नेपाली कला संस्कृतिलाई माया गर्ने आफ्नो चाहनामा थप प्रोत्साहन मिलेको छ । मलाई यो स्थानमा पुर्याउन सहयोग गर्नुहुने सम्पूर्ण, आफन्त तथा इष्टमित्रलगायत गैरआवासीय नेपाली संघका साथै निर्णायक मण्डललाईसमेत धन्यवाद दिन चाहन्छु'- युक्तिले भनिन् ।