गुल्मी–२ मा रास्वपाबाट पूर्व डीएसपी गोविन्द पन्थीको उम्मेदवारी

काठमाडौँ । गुल्मीको निर्वाचन क्षेत्र नम्बर–२ मा राष्ट्रिय स्वतन्त्र पार्टी (रास्वपा)बाट गोविन्द पन्थीले मनोनयन दर्ता गराएका छन् । मङ्गलबार निर्वाचन अधिकृतको कार्यालयमा पन्थीले उम्मेदवारी दर्ता गराएका हुन् । उनी नेपाल प्रहरीका पूर्व डीएसपी हुन् ।

गुल्मी–२ मा पन्थीले नेकपा एमालेका उम्मेदवार गोकर्ण विष्ट, कांग्रेसका भुवन श्रेष्ठ र नेपाली कम्युनिस्ट पार्टीका श्रीराम महतसँग प्रतिस्पर्धा गर्नेछन् । काठमाडौँ उपत्यका अपराध अनुसन्धान कार्यालयमा रहँदा पन्थी भिजिट भिसा मार्फत हुने असुली र मानव तस्करीबारे अनुसन्धान गरेर चर्चा कमाएका थिए । भ्रष्टाचार र असुलीतन्त्र विरुद्धको लडाइँ थप मजबुत बनाउन आफूले गुल्मीबाट उम्मेदवारी दिएको पन्थीले रातोपाटीलाई बताए । उनले भने, ‘मेरो लडाइँ भ्रष्टाचार र असुलीतन्त्र विरुद्ध हुनेछ ।’