दोस्रो एक दिवसीयमा अस्ट्रेलियाको सानदार जित, पाकिस्तान ४१ रनले पराजित

काठमाडौँ । तीव्र गतिका बलर नेथान एलिसको उत्कृष्ट बलिङ र ब्याटरहरूको संयमित प्रदर्शनको मद्दतले अस्ट्रेलियाले दोस्रो एक दिवसीय खेलमा पाकिस्तानलाई ४१ रनले पराजित गरेको छ । यस जितसँगै तीन खेलको शृङ्खला १–१ को बराबरीमा पुगेको छ ।

मंगलबार लाहोरमा पाकिस्तानले टस जितेर फिल्डिङ रोजेपछि पहिले ब्याटिङ गरेको अस्ट्रेलियाले निर्धारित ५० ओभरमा ९ विकेट गुमाउँदै २३१ रनको योगफल तयार पारेको थियो । अस्ट्रेलियाका लागि क्यामरुन ग्रीनले ५३ र जोस इङ्लिसले ५१ रनको अर्धशतकीय इनिङ्स खेले। त्यस्तै, म्याट रेन्शाले ४३ रनको महत्त्वपूर्ण योगदान दिए।