कैलाली–५ मा उम्मेदवार फेरिए, एजेन्डा उही पुरानै

धनगढी । सुदूरपश्चिमको चर्चित निर्वाचन क्षेत्र कैलाली–५ मा आगामी फागुन २१ गते हुने प्रतिनिधिसभा निर्वाचनका लागि दल तथा स्वतन्त्र उम्मेदवारहरू चुनावी तयारीमा जुटेका छन् । प्रदेशको अस्थायी राजधानी धनगढी समेटिएको यो क्षेत्र प्रदेशका ८८ स्थानीय तहमध्ये एक मात्र उपमहानगरपालिका समेत भएकाले हरेक चुनावमा विशेष चासोको केन्द्र बन्छ ।

२०७९ को निर्वाचनमा दलहरूलाई पछि पार्दै स्वतन्त्र उम्मेदवार गोपाल हमालको जितपछि कैलाली–५ अझ बढी चर्चामा आएको थियो । यसपटक मंगलबार ठुला, साना र स्वतन्त्र गरी १६ जना उम्मेदवारले मनोनयन दर्ता गराएका छन् ।