काभ्रे-२: मेयर छाडेर गोकुलको क्षेत्रमा आएका ब्याञ्जुलाई आचार्य र हुमागाईँको चुनौती

मकवानपुर । आसन्न निर्वाचनमा काभ्रे क्षेत्र नम्बर–२ को चुनाव रोचक र पेचिलो बन्ने निश्चित छ । एमालेको पक्कड क्षेत्रको रूपमा व्याख्या गरिएको काभ्रे–२ गोकुल बास्कोटाको क्षेत्र हो । लगातार २ पटक सो क्षेत्रबाट चुनाव जितेका बास्कोटालाई यसपटक भने टिकटबाट वञ्चित गरिएको छ ।

नेकपा एमालेका अध्यक्ष केपी शर्मा ओलीले प्रभावशाली नेता तथा पूर्वमन्त्री बास्कोटाको टिकट काटेर धुलिखेल नगरपालिकाका बहालवाला मेयर अशोक ब्याञ्जुलाई उम्मेदवार बनाएका छन् । जसका कारण सो क्षेत्र पछिको राजनीतिक समीकरण तरङ्गित भएको छ । मेयर पदबाट राजीनामा दिएर संसदीय राजनीतिमा होमिएका ५४ वर्षीय ब्याञ्जुका लागि संसद् भवनको यात्रा भने सहज देखिँदैन ।