सवारीको ब्लुबुक हराएमा वा झुत्रिएमा के गर्ने ? यस्तो छ प्रतिलिपि लिने अनलाइन तथा अफलाइन तरिका

काठमाडौं । सवारी चालकहरूका लागि ब्लुबुक (सवारी दर्ता किताब) एक अति नै महत्त्वपूर्ण कागजात हो । तर, कतिपय अवस्थामा असावधानीवश यो हराउन सक्छ, पानीमा भिजेर झुत्रो हुन सक्छ वा च्यातिएर काम नलाग्ने हुन सक्छ । यस्तो समस्या आइपर्दा नयाँ ब्लुबुक कसरी बनाउने र यसको कानुनी तथा प्रशासनिक प्रक्रिया के हुन्छ भन्नेबारे धेरै सवारी धनीहरू अन्योलमा पर्ने गरेका छन् ।

टेकपानाका पाठकहरू बिना रानाले आफ्नो ब्लुबुक हराएको र बिराज थापाले ब्लुबुक पानीमा भिजेर झुत्रो भएकाले अब के गर्ने भनेर जिज्ञासा राखेका छन् । टेकपानासँगको कुराकानीमा यातायात व्यवस्था कार्यालय (मोटरसाइकल), गुर्जुधाराका सूचना अधिकारी गोविन्दराज सिवाकोटीले प्रतिलिपि लिने प्रक्रियाबारे स्पष्ट पारेका छन् । उनका अनुसार ब्लुबुक हराएमा र झुत्रो वा च्यातिएमा अपनाउनुपर्ने प्रक्रियाहरू केही फरक छन् ।