औद्योगिक क्षेत्र व्यवस्थापन समितिबाट उद्योगीको प्रतिनिधित्व हटाउने निर्णय फिर्ता लिन माग

औद्योगिक क्षेत्र व्यवस्थापन लिमिटेडको सञ्चालक समितिबाट उद्योगीहरूको प्रतिनिधित्व हटाउने सरकारी निर्णय तत्काल फिर्ता लिन नेपाल औद्योगिक क्षेत्र उद्योग महासंघले माग गरेको छ। सरकारको निर्णयले औद्योगिक क्षेत्रको व्यवस्थापन, सुशासन र उद्योगमैत्री वातावरणलाई कमजोर बनाउने भन्दै महासंघले उक्त निर्णयको विरोधमा आन्दोलनका कार्यक्रमसमेत घोषणा गरेको हो ।

महासंघका अध्यक्ष एजाज आलमले सरकारले उद्योगीहरूको सरोकारसँग प्रत्यक्ष जोडिएको विषयमा सम्बन्धित पक्षसँग कुनै छलफल नगरी एकपक्षीय रूपमा निर्णय गरेको भन्दै त्यसलाई लोकतान्त्रिक मूल्य, सुशासन र उद्योग प्रवर्द्धनको भावनाविपरीत भएको बताए।