पारदर्शितामा प्रहरीको भूमिका महत्वपूर्ण

। नेपाल राष्ट्र बैङ्कका गभर्नर डा. विश्वनाथ पौडेलले वित्तीय प्रणालीको पारदर्शिता कायम गर्न नेपाल प्रहरीको अनुसन्धान प्रभावकारी हुने बताउनुभएको छ । नेपाल राष्ट्र बैङ्क तथा नेपाल प्रहरी प्रधान कार्यालयको आयोजनामा मङ्गलबार गभर्नर पौडेलले नेपाललाई ‘ग्रे लिस्ट’ बाट निकाल्न अनुसन्धानमा समन्वय आवश्यक रहेको बताउनुभएको हो ।

‘सम्पत्ति शुद्धीकरण, आतङ्ककारी कार्य, आमविनाशका हातहतियार निर्माण तथा विस्तारमा वित्तीय लगानी’ सम्बन्धी अपराध अनुसन्धान अनुशिक्षणमा गभर्नर पौडेलले वित्तीय प्रणालीको पारदर्शिता, सुशासन तथा आर्थिक स्थायित्व कायम गर्न सम्पत्ति शुद्धीकरण, आतङ्कवादी गतिविधिमा वित्तीय लगानी तथा आमविनाशका हातहतियारसँग सम्बन्धी अपराध नियन्त्रण गर्न आवश्यक रहेको बताउनुभयो । त्यसका लागि सम्पति शुद्धीकरणका मुद्दाको अनुसन्धान, अभियोजनमा दक्षता जरुरी रहेको बताउनुभयो ।

अपराधको अनुसन्धान तथा निगरानीमा नेपाल राष्ट्र बैङ्क तथा नेपाल प्रहरीबिचको समन्वय जरुरी रहेकोमा त्यसमा सहकार्य गरेर बढ्नुपर्नेमा उहाँले जोड दिनुभयो । यसै गरी सम्पत्ति शुद्धीकरणसँग सम्बन्धित अपराध अनुसन्धान गर्ने सबै निकायबिच पनि समन्वय आवश्यक रहेको उहाँको भनाइ थियो । वित्तीय अपराधमा नयाँ प्रवृत्ति र चुनौतीलाई चिरेर सन् २०२७ सम्ममा ‘ग्रे लिस्ट’ बाट निकाल्नुपर्नेमा उहाँको जोड थियो ।

नेपाल प्रहरी महानिरीक्षक दानबहादुर कार्कीले खुला सीमानाका भएको देशमा एकै घण्टामा अपराध छिपाउने सम्भावना प्रबल रहेको बताउँदै चनाखो हुनुपर्ने बताउनुभयो । उहाँले वित्तीय अपराधको स्वरूप दिनप्रतिदिन जटिल बन्दै गएकाले अनुसन्धानका लागि प्राविधिक ज्ञान, सिप र अन्तरनिकाय समन्वय आवश्यक रहेको बताउनुभयो । प्रहरीले हुन्डी कारोबार, सङ्गठित अपराध, मानव बेचबिखन तथा लागुऔषध ओसारपसार, आपराधिक लाभ, ठगी जस्ता अपराधको सफल अनुसन्धान गर्न प्रमाण सङ्कलन, वित्तीय विश्लेषण, अन्तरनिकायसँगको समन्वय, अन्तर्राष्ट्रिय सहकार्य गर्दै आएको उहाँको दाबी छ ।

पाँच दिवसीय तालिममा नेपाल राष्ट्र बैङ्कका कार्यकारी निर्देशक गुरुप्रसाद पौडेलले तालिमको महìवबारेमा प्रकाश पार्नुभएको थियो । कोशी प्रदेशका १४ जिल्लाबाट २४ जना प्रहरी सदस्यलाई तालिममा सहभागी गराइने छ ।

नेपाल सम्पत्ति शुद्धीकरण निवारणसम्बन्धी कानुनको परिपालनामा चुक्दा वित्तीय कारबाही कार्यदल (फाइनान्सियल एक्सन टास्कफोर्स–एफएटिएफ) को ‘ग्रे लिस्ट’ मा परेको छ ।