युवापुस्ताको सुरक्षाका लागि सामाजिक सञ्जालमा उमेर प्रमाणीकरण कडा बनाउँदै जापान

टोकियो : जापान सरकारले सामाजिक सञ्जाल प्रयोग गर्ने युवापुस्ताको सुरक्षाका लागि प्रयोगकर्ताको उमेर प्रमाणीकरण प्रक्रियामा कडाइ गर्ने योजना बनाएको छ। मंगलबार बसेको सञ्चार मन्त्रालयको सरकारी कार्यदलको बैठकले सामाजिक सञ्जाल सञ्चालक कम्पनीहरूको जिम्मेवारीलाई थप सुदृढ बनाउनुपर्ने निष्कर्ष निकालेको हो।

कार्यदलका अनुसार सामाजिक सञ्जाल कम्पनीहरूले प्रयोगकर्ताको उमेर प्रमाणीकरणमा कडाइ गर्नुका साथै नाबालिगहरूका लागि केही सुविधाहरूमा प्रतिबन्ध लगाउनुपर्ने हुन्छ। यद्यपि, विश्वका अन्य देशहरूमा जस्तो निश्चित उमेर समूहलाई लक्षित गरी सामाजिक सञ्जालमाथि पूर्ण रूपमा प्रतिबन्ध लगाउनु भने उपयुक्त नहुने कार्यदलको ठहर छ।