सिँचाइको पहुँचसँगै किसान लाभान्वित

दोलखा, जेठ २० गते । दोलखाको वैतेश्वर गाउँपालिका–४ र ५ मा निर्माणाधीन निम्कोट–भस्मेखोला सिँचाइ आयोजना सम्पन्न हुने चरणमा पुगेको छ । एसियाली विकास बैङ्कको सहयोगमा निर्माण भइरहेको दुई किलोमिटर लम्बाइ रहेको आयोजनाबाट ६५ हेक्टरभन्दा बढी जमिनमा सिँचाइ सुविधा पुग्ने पालिका अध्यक्ष छवि लामाले जानकारी दिनुभयो ।

उहाँका अनुसार फस्कु–प्रिसिजन जेभी काठमाडौँद्वारा निर्माणाधीन आयोजना अन्तर्गत हेडवक्र्स, क्यानल निर्माण, पाइप जडान तथा भस्मे खोलामा मुहान निर्माणको काम भइरहेको छ । आयोजना सम्पन्न भएपछि अर्चले, निम्कोट र लप्सेबेँसी क्षेत्रका दुई सयभन्दा बढी किसान प्रत्यक्ष लाभान्वित हुने छन् ।

निर्माण कम्पनीका प्रतिनिधि पुरुषोत्तम बुढाथोकीका अनुसार जेठ मसान्तभित्र आयोजनाको काम सकिन्छ । हाल पाइप जडानको काम भइरहेको र ९० प्रतिशत निर्माण सम्पन्न भएको उहाँले बताउनुभयो ।

आयोजनाबाट वैतेश्वर–३, मिर्गेका दुई सयभन्दा बढी किसानले पनि प्रत्यक्ष फाइदा लिने छन् । यसअघि स्थानीय किसान अस्थायी कुलोको भरमा सिँचाइ गर्न बाध्य थिए । धान रोपाइँ तथा गहुँबाली लगाउने समयमा उपभोक्ताले आफैँ कुलो मर्मत गरेर पानी खेतसम्म ल्याउनुपर्ने अवस्था थियो ।

पानीको पालो कुर्न रातभर खेतमा बस्नुपर्ने बाध्यतासमेत रहेको किसान पदम बस्नेतले दुःखेसो पोख्दै अब पक्की सिँचाइ सुविधा पुगेपछि रातभर पानी कुर्नुपर्ने र कुलो मर्मतमा समय खर्चिनुपर्ने समस्याको अन्त्य हुन लागेको बताउनुभयो ।

लप्सेक्षेत्रमा धान गहुँसँगै मौसमी तथा बेमौसमी तरकारी र मकै खेती हुने गरेको छ भने निम्कोट क्षेत्रमा मुख्य रूपमा धान र गहुँ खेती हुने गर्छ । सिँचाइको सहज पहुँचसँगै खेतीयोग्य जमिनको उपयोग बढ्नुका साथै कृषि उत्पादनमा उल्लेख्य वृद्धि हुने अपेक्षा गरिएको छ ।