निवृत्त जीवनका चार वर्ष : पढाइ, लेखाइ र रूपान्तरणको अभियान

हुन त मैले निजामती सेवाबाट निवृत्त हुँदाका बखत नै आफूले भोगेका उतारचढावको बारेमा ६ महिनाभित्र पुस्तक प्रकाशन गरूँला भन्ने थियो । नेपालको प्रशासनिक इतिहासमा दलित समुदायबाट पहिलोपटक नेपाल सरकारको सचिव तहमा पुगेको कुराले पनि यो विषय रुचिको हुने भएर होला धेरै साथीभाइले यस्तो सुझाव दिनुभएको थियो ।

म २०४७ सालमा निजामती सेवाको शाखा अधिकृत (प्रशासन सेवामा) प्रवेश गर्दा नै समुदायबाट अरु कोही भएको मैले भेटेको थिइनँ । २०६७ सालमा सहसचिव हुँदा पनि पहिलो नै हुने मौका भयो भने नेपालको प्रशासनिक तहमा सबैभन्दा शक्तिशाली ठानिने प्रमुख जिल्ला अधिकारी हुँदा पनि पहिलो नै हुने मौका मिल्यो । म आफू एक कर्मचारी भएको हिसाबले यो पदोन्नति हुँदै उच्च तहमा पुग्नु मेरो लागि अवसर त हुने नै भयो तर राज्यको लागि भने यो लज्जास्पद कुरा हो भन्दै आएको छु ।