चोग्यालको आग्रहपछि वीरेन्द्रको जवाफ – हामी आफैँ भारतीय दबाबमा छौँ

भारतीय राजनीतिमा पहिलो महिला प्रधानमन्त्रीका रूपमा इन्दिरा गान्धीको उदयसँगै सबैभन्दा सशङ्कित कुनै राष्ट्र थियो भने त्यो सिक्किम नै हो। तत्कालीन सोभियत सङ्घको तास्कन्दमा लालबहादुर शास्त्रीको रहस्यमय निधन भएपछि ११ माघ २०२२ मा इन्दिराले तेस्रो भारतीय प्रधानमन्त्रीका रूपमा शपथ लिएकी थिइन्।

इन्दिरा प्रधानमन्त्री नियुक्त हुनुभन्दा नौ महिनाअघि मात्र सिक्किमका चोग्याल (राजा) पाल्देन थोन्दुप नाम्ग्यालको राज्याभिषेक भएको थियो। सन् १९५० मा भारत र सिक्किमबीच शान्ति तथा मैत्री सन्धि हुँदा सिक्किमलाई आफ्नो संरक्षित राज्यका रूपमा भारतले स्वतन्त्र देशको मान्यता दिएको थियो। तर, १९६२ मा चीनसँग युद्ध भएपछि भारत आफ्नो मान्यताबाट पछाडि हट्दै गयो र सिक्किममाथि दबाब बनाउन थाल्यो।