लोकप्रियता र अपरिपक्वताको चेपुवामा बालेन सरकार [भिडियोसहित]

काठमाडाैं । फागुन २१ मा भएको निर्वाचनमार्फत राष्ट्रिय स्वतन्त्र पार्टी सत्तामा आयो । नेपाली जनताले निर्वाचन मार्फत सत्तामा दशकौंदेखि स्थापित राजनीतिक शक्तिहरूको विकल्प खोजे । त्यसैले पनि प्रधानमन्त्री बालेन्द्र शाहप्रति जनताको धेरै आकाक्षाँ थियो र छ । यही परिवेशमा विद्रोही सोच, प्रशासनिक सुधारको प्रतिबद्धता र भ्रष्टाचारविरुद्धको स्पष्ट अडानका आधारमा शाहको नेतृत्वमा दुई–तिहाइ बहुमतसहितको सरकार गठन भएको कल्पना गर्नु आफैँमा यो व्यवस्था र नेपाली राजनीतिका लागि एउटा रोचक र ऐतिहासिक परिदृश्य हो ।

सरकारसँग जनताले ठूलो अपेक्षा राख्नु स्वाभाविक हो । पुराना राजनीतिक अभ्यासको अन्त्य, छिटो निर्णय, सुशासन, पारदर्शिता र परिणाममुखी कार्यशैलीको अपेक्षाले नै जनादेश निर्माण हुन्छ। तर, लोकतान्त्रिक शासन केवल लोकप्रियताले मात्र सफल हुँदैन । राज्य सञ्चालन एउटा जटिल संस्थागत प्रक्रिया हो, जहाँ संविधान, कानुन, प्रशासन, न्यायपालिका, संसद्, कूटनीति, अर्थतन्त्र र सार्वजनिक विश्वासबीच सन्तुलन कायम गर्नुपर्ने हुन्छ ।