प्रभु बैंकद्वारा अन्नपूर्ण माध्यमिक विद्यालयलाई स्मार्ट बोर्ड हस्तान्तरण

पालुङटार (गोरखा) । प्रभु बैंक लिमिटेडले संस्थागत सामाजिक उत्तरदायित्व (सीएसआर) अन्तर्गत श्री अन्नपूर्ण माध्यमिक विद्यालयलाई स्मार्ट बोर्ड प्रदान गरेको छ । गण्डकी बिजनेस सेन्टरको समन्वय तथा पालुङटार शाखाको सक्रिय पहलमा सम्पन्न यस कार्यक्रमले विद्यार्थीहरूको सिकाइ अनुभवलाई प्रविधिमैत्री बनाउने लक्ष्य लिएको छ ।

शिक्षामा डिजिटल पहुँच विस्तार गर्दै विद्यार्थीहरूलाई गुणस्तरीय र अन्तरक्रियात्मक शिक्षणसँग जोड्न स्मार्ट बोर्ड हस्तान्तरण गरिएको बैंकले जनाएको छ । यस प्रविधिले कक्षाकोठाको पढाइलाई थप प्रभावकारी बनाउनुका साथै शिक्षक र विद्यार्थीबीचको अन्तरक्रियालाई नयाँ आयाम दिने अपेक्षा गरिएको छ । विश्व तीव्र रूपमा डिजिटल रूपान्तरणतर्फ अघि बढिरहेको सन्दर्भमा यस्ता उपकरणले विद्यार्थीहरूलाई भविष्यका लागि सक्षम, दक्ष र प्रतिस्पर्धी नागरिकका रूपमा तयार पार्न महत्त्वपूर्ण योगदान पुर्याउने बैंकको विश्वास छ ।