कुवेत विमानस्थलमा इरानी ड्रोन आक्रमण, व्यावसायिक उडानहरू ठप्प

काठमाडौँ । इरान र संयुक्त राज्य अमेरिकबिच बढ्दो सैन्य तनावका कारण मध्यपूर्वको सुरक्षा स्थिति झनै गम्भीर मोडमा पुगेको छ। बुधवार कुवेत अन्तर्राष्ट्रिय विमानस्थलमा इरानी ड्रोनले भीषण आक्रमण गरेपछि त्यहाँका सम्पूर्ण व्यावसायिक उडानहरू तत्कालका लागि स्थगित गरिएका छन्। यस घातक आक्रमणमा परी धेरै मानिस घाइते भएका छन् भने विमानस्थलको भौतिक संरचनामा गम्भीर क्षति पुगेको कुवेत सरकारले पुष्टि गरेको छ।

कुवेतको रक्षा मन्त्रालयका प्रवक्ता ब्रिगेडियर जनरल साउद अब्दुलाजिज अल–ओतैबीका अनुसार धेरैको सङ्ख्यामा आएका शत्रुतापूर्ण ड्रोनहरूले विमानस्थलको यात्रु भवन (प्यासेन्जर टर्मिनल) लाई सिधै लक्षित गरी आक्रमण गरेका थिए। इरानसँगको जारी युद्धकै कारण लामो समयदेखि अस्थायी रूपमा बन्द रहेको यो विमानस्थल हालै जुन १ मा मात्र पुनः सञ्चालनमा आएको थियो।