प्रकृतिबाट समृद्धिसम्मको यात्रा: नेपालले स्कटल्यान्डबाट के सिक्ने?

केही दिनयता स्कटल्यान्डका पहाड, हरियाली, ताल, समुद्र, पुराना किल्ला, सुन्दर गाउँबस्ती र यहाँको जीवनशैलीलाई नजिकबाट नियालिरहेकी छु। एउटा नेपाली महिलाका रूपमा यहाँ घुमिरहँदा मैले केवल एउटा सुन्दर देश देखिरहेकी छैन, मेरा आँखाले बारम्बार नेपाललाई खोजिरहेका छन्।

स्कटल्यान्डका उच्चभूमिका पहाड हेर्दा नेपालको हिमाल सम्झिन्छु, यहाँका हरिया डाँडाकाँडा देख्दा हाम्रा गाउँ सम्झिन्छु, स्थानीय उत्पादन र साना व्यवसाय देख्दा नेपालका महिला उद्यमी सम्झिन्छु अनि युवाहरूलाई नयाँ प्रविधि र सिर्जनशीलतासँग जोडिएको देख्दा नेपालका लाखौं सम्भावनाशील युवाको भविष्य सम्झिन्छु।