जुलाई २४ मा रात्रिभोजमा सहभागी हुँदैछन् ट्रम्प

वासिङटन डीसी । अमेरिकी राष्ट्रपति डोनाल्ड ट्रम्पले आगामी जुलाई २४ मा पुनः निर्धारित गरिएको ह्वाइट हाउस संवाददाता सङ्घ (डब्ल्यूएचसीए) को वार्षिक रात्रि भोजमा सहभागी हुने घोषणा गरेका छन् । यो वार्षिक ब्ल्याक–टाई कार्यक्रम अप्रिल २५ मा भएको एक सुरक्षा घटनापछि स्थगित गरिएको थियो ।

सो समयमा एक संदिग्ध व्यक्तिले कार्यक्रम स्थल बाहिर सुरक्षा चेकपोइन्टमा प्रवेश गरी बन्दुक चलाएपछि कार्यक्रम तत्काल रोकिएको थियो । घटनाका बेला राष्ट्रपति ट्रम्प र प्रथम महिला मेलानिया ट्रम्प पनि उपस्थित थिए र उनीहरूलाई सुरक्षित रूपमा बाहिर निकालिएको थियो ।

डब्ल्यूएचसीए अध्यक्ष तथा सीबीएस न्युजकी ह्वाइट हाउस संवाददाता वेजिया जियाङले सदस्यहरूलाई लेखेको पत्रमा कार्यक्रम पुनः आयोजना गर्ने निर्णय सजिलै नलिइएको बताएकी छिन् । उनका अनुसार यस पटक कडा सुरक्षा व्यवस्था, नयाँ प्रवेश प्रक्रिया र थप सावधानीका उपायहरू अपनाइनेछ ।

ट्रम्पले सामाजिक सञ्जाल ‘ट्रुथ सोसल’ मा लेख्दै जियाङले उनलाई कार्यक्रममा बोल्न आग्रह गरेको र उनले स्वीकार गरेको बताएका छन् । उनले आफ्नो भाषण कस्तो हुनेछ भन्नेबारे अनिश्चितता व्यक्त गर्दै परिस्थिति अनुसार कडा टिप्पणी पनि हुनसक्ने बताएका छन् । यस पटक कार्यक्रम वासिङ्टन डीसीस्थित वाल्डोर्फ एस्टोरिया होटलमा हुनेछ ।