फिफा विश्वकप २०२६ का लागि भ्यान हेलेनको चर्चित गीत ‘जम्प’ को नेपाली संस्करण सार्वजनिक 

काठमाडौँ । फिफा विश्वकप २०२६ को विश्वव्यापी रौनक नेपाली सङ्गीतप्रेमी र फुटबल प्रशंसकहरूका लागि अझ विशेष बन्ने भएको छ । विश्वप्रसिद्ध ब्यान्ड 'भ्यान हेलेन' (Van Halen) को सन् १९८४ को लेजेन्डरी रक क्लासिक गीत ‘जम्प’ (JUMP) को आधिकारिक नेपाली संस्करण सार्वजनिक गरिएको छ ।

नेपाली सङ्गीत आकाशका प्रख्यात गायक तथा सङ्गीतकार भेक (VEK) र चर्चित अभिनेता प्रदीप खड्काको सहकार्यमा यो फिफा विश्वकप एन्थम (Anthem) तयार पारिएको हो ।

बहुप्रतीक्षित फिफा विश्वकप २०२६ का लागि बहुराष्ट्रिय ब्रान्ड कोका-कोला (Coca-Cola) सँगको सहकार्यमा यो ट्रिब्युट गीत निर्माण गरिएको हो । हालै मात्र यो विश्वप्रसिद्ध ट्र्याकलाई अन्तर्राष्ट्रिय स्तरमा जे बाल्विन (J Balvin), ट्रेभिस बार्कर (Travis Barker), स्टिभ भाई (Steve Vai), र म्याकफ्लाई (McFlyy) जस्ता दिग्गज कलाकारहरूले रिइम्याजिन (Reimagine) गरेका थिए । सोही विश्वव्यापी लहरमा अब यस गीतमा मौलिक नेपाली स्वाद पनि थपिएको छ, जसले नेपाली कला र सङ्गीतलाई विश्वमञ्चमा पनि प्रतिनिधित्व गराएको छ ।

यो विशेष साङ्गीतिक भिडियोलाई निर्देशक अनुप सापकोटाले निर्देशन गरेका हुन् भने यसको निर्माण ‘टप अफ द वर्ल्ड फिल्म्स’ (Top Of The World Films) ले गरेको हो ।

"नेपालबाट विश्वका लागि" भन्ने मूल भावनाका साथ तयार पारिएको गीतको पूर्ण म्युजिक भिडियो अहिले युट्युबमा उपलब्ध भइसकेको छ ।

फुटबलको महाकुम्भ नजिकिँदै गर्दा सार्वजनिक भएको यो एन्थमले नेपाली फुटबल फ्यानहरूमाझ छुट्टै तरङ्ग पैदा गर्ने र नेपाली कलाकारहरूलाई अन्तर्राष्ट्रिय स्तरमा स्थापित गर्न बलियो टेवा पुर्‍याउने अपेक्षा गरिएको छ ।