‘नेपाल भारतबिच मनमुटाब गराएर विध्वंस मच्चाउने हर्कत नगर्नुस्, राजीनामा दिनुस्’

काठमाडौँ । नेपाली कम्युनिस्ट पार्टीका सांसद विष्णुबहादुर विश्वकर्माले प्रधानमन्त्री बालेन्द्र शाहहको राजीनामा माग गरेका छन् । बुधवार बसेको राष्ट्रिय सभाको बैठकमा विशेष समय लिएर बोल्दै उनले प्रधानमन्त्री शाहले राष्ट्रघात गरेको आरोप लगाउँदै तत्काल पदबाट राजीनामा दिन माग गरेका हुन् ।

सांसद विश्वकर्माले प्रधानमन्त्रीले प्रतिनिधि सभामा सांसदहरूले सोधेको प्रश्नको जवाफ नदिएर कपोलकल्पित, आधारहीन र नाटकीय अभिव्यक्ति दिएको आरोप लगाए । प्रधानमन्त्रीले दिएको ‘नेपालले भारतको भूमि अतिक्रमण गरेको रहेछ’ भन्ने अभिव्यक्तिप्रति कडा आपत्ति जनाउँदै उनले त्यसको कुनै तथ्यगत आधार नरहेको दाबी गरे । प्रधानमन्त्रीको उक्त भनाइले नेपालको भौगोलिक अखण्डता र सार्वभौमसत्तामाथि गम्भीर आँच पुगेको र यो अभिव्यक्ति विखण्डनकारी एवं आत्मसमर्पणवादी भएको उनको जिकिर छ ।