साफ महिला च्याम्पियनसिप : प्रीतिसहित चार खेलाडी सुरुआती–११ मा

काठमाडौं । भारतमा जारी साफ महिला च्याम्पियनसिपमा बंगलादेशविरुद्धको सेमिफाइनल खेल्ने नेपाली टिमको सुरुआती–११ सार्वजनिक भएको छ ।

बुधबार मुख्य प्रशिक्षक नविन न्यौपानेले कप्तान एञ्जिला तुम्बाप्पो सुब्बाको कप्तानीमा आफ्नो पहिलो रोजाइ सार्वजनिक गरेका हुन् ।

टिममा नियमित कप्तान एञ्जिलालाई मौका दिइएको छ । कम्बोडियामा लिग खेलिरहेकी मिडफिल्डर प्रीति राई पहिलो रोजाइमा परेकी छन् । उनको यो पहिलो खेल हो । त्यसैगरी, अनिता लम्जेलले पहिलो रोजाइमा पुनरागमन गरेकी छन् । साथै, रक्षक पुजा रानाले पनि सुरुआती–११ मा स्थान बनाएकी छन् ।

लिग चरणको अन्तिम खेलमा श्रीलंकाविरुद्ध पहिलो रोजाइमा परेकी गोलकिपर अञ्जना रानामगर, फरवार्ड मीना देउवा तथा रक्षक प्रतिक्षा चौधरी र हिराकुमारी भुजेल बेन्चमा छन् ।

खेल भारतको गोवास्थित जवहारलाल नेहरु रंगशालामा नेपाली समयअनुसार अपराह्न ४:१५ देखि सुरु हुनेछ ।

नेपाल समूह ‘ए’को विजेता र बंगलादेश समूह ‘बी’को उपविजेताका रूपमा सेमिफाइनल प्रवेश गरेका हुन् ।

नेपालको पहिलो रोजाइ

एञ्जिला तुम्बाप्पो सुब्बा, अनिता लम्जेल, प्रीति राई, विमला बिक, रेनुका नगरकोटे, गीता राना, रश्मीकुमारी घिसिङ, दीपा साही, रेखा पौडेल, सरु लिम्बू, पुजा राना

#भारत

#महिला च्याम्पियनसिप