पाकिस्तानमा प्रहरी मुख्यालयमा आक्रमण, ३१ जनाको *मृ*त्यु

एजेन्सी– पाकिस्तानको उत्तरी क्षेत्रमा रहेको प्रहरी मुख्यालयमा भएको विस्फोट र गोलीबारीमा परी मृत्यु हुनेको सङ्ख्या कम्तीमा ३१ पुगेको छ। मृतकमध्ये १६ जना प्रहरी कर्मचारी रहेको एक वरिष्ठ प्रहरी अधिकारीले बताएका छन्। घटनामा १०० भन्दा बढी व्यक्ति घाइते भएका छन्।

शुक्रबार दिउँसो खैबर पख्तुनख्वा प्रान्तको कोहाटस्थित पुरानो प्रहरी लाइन परिसरमा प्रवेश गरेका आक्रमणकारीहरूले हमला गरेका थिए। करिब दुई लाख २० हजार जनसङ्ख्या रहेको कोहाटको उक्त प्रहरी परिसर जिल्ला तहको मुख्यालय हो। त्यहाँ आतंकवाद नियन्त्रण विभाग, विशेष शाखालगायत विभिन्न प्रहरी इकाइका कार्यालयहरू सञ्चालनमा छन्।