पोखराको फेवातालमा हावाहुरीले अलपत्र १२ पर्यटकको सकुशल उद्धार, एक विदेशी महिलासहित सबै सुरक्षित

पोखरा । कास्कीको पोखरा महानगरपालिका–६ स्थित फेवातालमा शनिबार अपराह्न एक्कासि आएको तीव्र हावाहुरीका कारण ‘बोटिङ’ गरिरहेका १२ जना पर्यटक तालको बीच भागमा अलपत्र परेको घटनामा सशस्त्र प्रहरी बल (एपिएफ) को तत्काल परिचालित विशेष टोलीले सबैको सकुशल उद्धार गरेको छ।

लामो समयदेखि पर्यटकीय आकर्षणको केन्द्र रहेको फेवातालमा शनिबार दिउँसो करिब ४:३५ बजे एकाएक मौसममा बदली भई तीव्र गतिको हावाहुरी चल्न थालेको थियो। हावाको वेगले तालमा उच्च छाल उठ्न थालेपछि भाडामा लिइएका ‘सर्फेस बोट’ तथा ‘प्याडल बोट’ अनियन्त्रित हुन पुगेका थिए। सोही क्रममा नेपालका विभिन्न जिल्लाबाट घुम्न आएका ११ जना स्वदेशी पर्यटक र जापानबाट आएकी एक ४८ वर्षीया विदेशी महिला पर्यटकसमेत गरी १२ जना तालको बीच भागमा डुङ्गासहित फसेका थिए।