भ्रष्टाचार र दण्डहीनताको जरा गहिरो छ तर जरो उखेल्ने हातहरू झनै बलियो बनाएका छौँ : प्रधानमन्त्री

काठमाडौँ- प्रधानमन्त्री बालेन्द्र शाह ‘बालेन’ले मुलुकमा भ्रष्टाचार र दण्डहीनताको जरा गहिरो रहेको बताएका छन्। संविधान दिवसको अवसरमा टुँडिखेलमा आयोजित समारोहलाई सम्बोधन गर्दै उनले भ्रष्टाचारको जरो उखेल्ने हातहरू अब झनै बलिया र धेरै भएको बताएका हुन् ।विकासका लागि सुशासन अनिवार्य पूर्वसर्त भएको कुरामा सरकार सचेत रहेको उनको भनाइ छ। वर्तमान सरकारले सुशासन कायम गर्न प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासन यन्त्रमा राजनीतिक तटस्थता र सार्वजनिक पदमा योग्यताका आधारमा नियुक्ति प्रक्रिया अवलम्बन गरेको शाहले स्पष्ट पारे।

‘भ्रष्टाचार र दण्डहीनताको जरो गहिरो छ’, प्रधानमन्त्री शाहले भने, ‘तर यो जरो उखेल्ने हातहरू अब झन् बलिया र धेरै छन्।’ सुशासन नारा मात्र नभएर काम भएको भन्दै उनले सरकार सोहीअनुसार अघि बढिरहेको उल्लेख गरे। सङ्घ, प्रदेश र स्थानीय तहबिच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य प्राप्त गर्न सरकार प्रतिबद्ध रहेको उनले बताए। आफूहरू पुरानै बाटोमा नहिँड्ने उनको दाबी छ।