प्रमको भारत भ्रमण तत्काल नहुने परराष्ट्रमन्त्रीको संकेत

प्रधानमन्त्री केपी शर्मा ओली छिमेकी मुलुक भारत भ्रमणमा जाने विषय अनिश्चित बन्दै गएको छ। प्रधानमन्त्री ओलीको आगामी विदेश भ्रमण भारतबाहेकका राष्ट्रमा हुने बताइएको छ। प्रतिनिधिसभाको अन्तर्राष्ट्रिय सम्बन्ध र पर्यटन समितिको सोमबारको बैठकमा परराष्ट्रमन्त्री आरजु राणाले प्रधानमन्त्रीको आगामी विदेश भ्रमण भारतबाहेकका राष्ट्रमा हुने संकेत गरेकी हुन्।

प्रधानमन्त्रीको पछिल्लो वैदेशिक भ्रमणका सम्बन्धमा समितिले सोमबार गरेको छलफलमा परराष्ट्रमन्त्री आरजु राणाले प्रधानमन्त्रीको भारत भ्रमणको कुनै चर्चा गरिनन्। उनले प्रधानमन्त्रीको निकट भविष्यमा हुने भ्रमण भारतबाहेक अन्य देशहरूमा हुन सक्ने बताइन्। समिति सभापति राजकिशोर यादवले नै प्रधानमन्त्रीको भविष्यमा हुने कुनकुन देशहरू छन् भनेर सोधेपछि परराष्ट्रमन्त्री राणाले यस्तो संकेत गरेकी हुन्। अन्तर्राष्ट्रिय सम्बन्ध र पर्यटन समितिले चीन भ्रमणअघि नै प्रधानमन्त्रीको भविष्यमा हुन गइरहेको बैठकबारे मंसिर २ गते छलफलका लागि बोलाएको थियो। तर समितिमा सरकारको कुनै प्रतिनिधि नहुने भएपछि सो बैठक नै स्थगित भएको थियो।