‘रासायनिक विषादीबिनै राम्रो उत्पादन सम्भव’

उत्पादन बढाउन रासायनिक विषादीको व्यापक प्रयोग भइरहेको पाइन्छ। अधिकांश साना तथा ठुला किसानले रासायनिक विषादीको प्रयोगबिना उत्पादन गर्नै छाडेका छन्। बजारमा रासायनिक मल र विषादी अभाव हुँदा त्यस्ता किसानलाई निकै छटपटाहट हुने गरेको छ। तर चितवनका केही किसान भने रासायनिक विषादीको प्रयोग नगरी पनि मनग्गे उत्पादन गर्न सकिन्छ भन्ने प्रमाण बनेर उभिएका छन्।

भरतपुर महानगरपालिका–१५ का चन्द्रप्रसाद अधिकारीले जैविक विषादी र प्रांगारिक मलको मात्र प्रयोग गरेर राम्रै उत्पादन लिइरहेका छन्। चार बिघामा तरकारी खेती गरिरहेका उनले रासायनिक विषादीबिना पनि उत्पादन सम्भव छ भन्ने उदाहरण पेस गरिरहेका छन्। उनको जमिनले पछिल्लो समय मात्र नभएर २०४७ सालदेखि नै रासायनिक पदार्थ देख्न पाएको छैन। ‘रासायनिक मल, विषादी र औषधि किन्न धेरै पैसा खर्च हुन्छ। यताबाट एक लाख रुपैयाँ कमाउँदा उता पसलमा त्योभन्दा बढीको बिल बनिरहेको हुन्थ्यो,’ उनले भने, ‘अहिले मेरोमा एग्रोभेटको बिल शून्य छ। गोडमेलमा खर्च बढे पनि उत्पादन कत्ति पनि घटेको छैन।’ प्रांगारिक खेतीबाट लगानी उठाउन कुनै गाह्रो नपर्ने उनी बताउँछन्।