भारतमा १६ नेपाली बन्धक, उद्धारका लागि परिवारको हारगुहार

बर्दिबास : रोजगारीका लागि भारत पुगेका महोत्तरीको बर्दिबास नगरपालिका-१४ स्थित एकीकृत नमुना मुसहर बस्तीका बालबालिकासहित १६ जना नेपाली बन्धकमा परेका छन्। उनीहरूलाई काम गराएपछि ज्याला नदिई बन्धक बनाइएको पीडितमध्येकी किरण सदाले टेलिफोनमार्फत जानकारी दिएका छन्।

पीडितका अनुसार उनीहरूलाई डर, त्रास र कुटपिट गर्दै यातना दिइएको छ। यातनासम्बन्धी फोटो र भिडियोसमेत परिवारजनले प्राप्त गरेका छन्। बन्धक बनाइएका आफ्ना आफन्तको खोजतलास, सकुशल उद्धार तथा दोषीमाथि कानुनबमोजिम कारबाहीको माग गर्दै पीडित परिवारले इलाका प्रहरी कार्यालय बर्दिबासमार्फत भारतको नयाँ दिल्लीस्थित नेपाली दूतावासमा निवेदन दिएका छन्। बर्दिबास नगरपालिका-१४ का वडाध्यक्ष विजयकुमार महतोका अनुसार पीडित परिवारले उद्धारका लागि पहल गरिदिन आग्रह गरेका छन्।