ऊनबाट टोपी, टोपीबाट आम्दानी

जुम्लाको चन्दननाथ नगरपालिका–८ कोटिला गाउँका ४८ वर्षीय रतन बुढाको हातमा अहिले पनि खरायोको ऊनसँगै भविष्य बुन्ने सीप छ। झन्डै २५ वर्षअघि सुरु गरेको सीप अहिले उनको परिवारको आम्दानीको भरपर्दो आधार बनेको छ।

२०५८ सालदेखि खरायोको ऊनबाट टोपी बुन्दै आएका रतनले घरमै सिकेको सीपलाई विस्तारै व्यवसायमा बदले। अहिले उनको गोठमा ४० देखि ४५ वटा ‘अंगुर’ जातका खरायो छन्। खरायो पालन र त्यसबाट हुने विभिन्न आम्दानीबाट उनले वार्षिक १ लाख ८० हजार रुपैयाँभन्दा बढी कमाउँदै आएका छन्।