'डिपोर्ट' भई आउनेहरूको कथा

'फेरि ट्राई हान्ने हो अमेरिका! रहरै हो, जाग्यो। समुद्र नाघ्ने मन लाग्यो। बिदेसिनै परेपछि किन खाडी, मलेसिया जानु? त्यहाँ जान त समस्यै भएन। जतिबेलै जान सकिन्छ। आफ्नै भेगतिरका मान्छेहरूको प्रवृत्ति पछ्याउँदै अमेरिकै छिर्ने हो। चाहे पहाडको पाखो बेच्नु परोस् या तराईको दुई कट्ठा जग्गै फाल्न परोस्। हुँदा खाँदाको व्यवसाय त्याग्न परेनि, पोहोर किनेको नाइट बस सस्तैमा फ्याँक्न परेनि अमेरिकै छिर्ने हो। महिनौं लागोस् कि ज्यानै जोखिममा परोस्! कि छोरो रेलमा, कि छोरो जेलमा!'

यही सोचका साथ उनीहरूको यात्रा आरम्भ भएको थियो।