अहिले औसत रहेको अधिकतम तापक्रम अर्को हप्ता बढ्ने

काठमाडौं । देशका केही भूभागमा आज उच्च गर्मी हुनेछ । केही स्थानमा भने वर्षाको पनि सम्भावना छ ।

जल तथा मौसम विज्ञान विभागका अनुसार दिउँसो मधेस, कोसी, वाग्मती र गण्डकी प्रदेशको तराईमा तातो दिन हुने सम्भावना छ । गर्मी बढ्ने क्रममा रहेको मौसमविद्ले बताएका छन् ।

हिमाली र पहाडी भूभागमा भने साधारणतया बादल लाग्नेछ । तराई भूभागमा आंशिक बादल लाग्नेछ ।

लुम्बिनी र सुदूरपश्चिम प्रदेशलगायत देशको हिमाली र पहाडी भूभागका थोरै स्थानमा मेघगर्जन/चट्याङसहित मध्यमसम्मको वर्षा/हिमपातको सम्भावना छ ।

विभागले राति कोसी र मधेस प्रदेशलगायत देशको हिमाली भूभागमा साधारणतया बादल लाग्ने बताएको छ । पहाडी भूभागमा आंशिक बादल लाग्नेछ । बाँकी तराई भूभागमा मुख्यतया सफा रहनेछ ।

कोसी र मधेस प्रदेशलगायत वाग्मती, गण्डकी, लुम्बिनी र कर्णाली प्रदेशको हिमाली र पहाडी भूभागका एक/दुई स्थानमा हल्का वर्षा/हिमपातको सम्भावना छ ।

मौसमविद् विनोद पोखरेल नेपालका केही ठाउँमा वर्षा भए पनि धेरै ठाउँमा गर्मी बढ्ने क्रममा रहेको बताउँछन् । उनका अनुसार मनसुन अझै एक हप्तासम्म आउने सम्भावना छैन । मनसुन जेठको अन्तिम साता आउने सम्भावना रहेको उनको भनाइ छ ।

“अहिलेसम्म धेरै ठाउँमा औसतभन्दा धेरै कम तापक्रम थियो । तर, यो हप्ता औसत तापक्रम रहनेछ,” उनी भन्छन्, “अर्को हप्ताको सुरुमा गर्मी धेरै बढ्ने देखिन्छ ।”

बुधबार भैरहवामा अधिकतम तापक्रम ४१ डिग्री सेल्सियस रहेको थियो । नेपालगन्जमा ३९.५ डिग्री सेल्सियस रहेको थियो । सिमरा र जनकपुरको तापक्रम समान ३८.२ तथा धनगढीको तापक्रम ३८.१ डिग्री सेल्सियससम्म पुगेको थियो । अधिकतम तापक्रम बढ्नेक्रममा रहेको छ । पानी पार्ने प्रणाली कमजोर हुँदै जाँदा गर्मी बढ्दै गएको छ ।

हाल नेपालको पश्चिम भूभाग आसपास उपल्लो वायुमण्डलमा रहेको न्यूनचापीय प्रणाली तथा स्थानीय वायुको आंशिक प्रभाव रहेको छ ।

#तापक्रम

#मौसम

#अधिकतम तापक्रम