अब गुगलको एआई सर्चमा आफ्नो सामग्री देखाउने/नदेखाउने निर्णय वेबसाइट सञ्चालक आफैँले गर्न सक्ने

काठमाडौँ । गुगलले वेबसाइट मालिक, सञ्चालक तथा प्रकाशकहरूका लागि सर्च कन्सोलमा नियन्त्रण (कन्ट्रोल) दिने नयाँ फिचर सार्वजनिक गरेको छ । कम्पनीले आर्टिफिसियल इन्टेलिजेन्स (एआई) को बढ्दो प्रयोगसँगै वेबसाइट सञ्चालकलाई आफ्नो सामग्रीको प्रदर्शन र प्रयोगबारे स्पष्ट नियन्त्रण दिन याे सुविधा ल्याएको जनाएको छ । यस फिचरबाट वेबसाइट सञ्चालक तथा प्रकाशकहरुले आफ्नो सामग्री गुगलका एआई आधारित खोजमा प्रयोग गर्न दिने वा नदिने निर्णय आफैँ गर्न सक्ने भएका छन् ।

नयाँ सुविधाअनुसार वेबसाइट मालिकहरूले गुगल सर्च कन्सोलमार्फत आफ्नो सामग्री AI Overviews र AI Mode जस्ता एआई खोज सुविधामा देखाउने वा नदेखाउने विकल्प पाउनेछन् । यदि कुनै वेबसाइटले यसबाट बाहिरिने निर्णय गरेमा उनीहरूको सामग्री गुगलको एआई सर्च नतिजाहरूमा देखिने छैन ।