विदेशमा कुरिलो टिप्ने युवालाई स्वदेशमै निगुरो टिप्न फर्काऔं 

लामो समय वन क्षेत्रमा कार्यरत फरेस्टर डा. जगदीशचन्द्र बरालले आफ्नो संस्मरण ‘वन, समुदाय र म’ पुस्तकमा लेखेका छन्– ‘नेपालले विश्वमा देखाउन लायक प्रगति गरेको क्षेत्र सामुदायिक वन हो।’ नेपाल अन्तर्राष्ट्रिय वातावरण जगतमा सामुदायिक वनको चिनारीबाट समेत चिनिएको छ।

सामुदायिक वनले स्थानीय उपभोक्ताहरूलाई प्रजातान्त्रिक प्रक्रियामा आबद्ध गराएको छ। सामुदायिक वनको अवधारणाले समुदायलाई एकीकृत मात्रै गराएको छैन, रोजगारी, गरिबी निवारण र सामूहिक भावनाको विकास समेत गराएको छ। यसले वनको संरक्षण, विकास र व्यवस्थापनमा समेत स्थानीय बासिन्दालाई निर्णय प्रक्रियामा सहभागी हुने अवसर प्रदान गरेको छ। यसैले स्थानीय नेतृत्वको पाठशाला नै सामुदायिक वन उपभोक्ता समिति बनेका छन्।