राष्ट्रपतिबाट रनिङ सिल्डको उद्घाटन

काठमाडौं : राष्ट्रपति रामचन्द्र पौडेलले १६औं केन्द्रीय राष्ट्रपति रनिङ सिल्ड खेलकुद प्रतियोगिताको उद्घाटन गरेका छन्। त्रिपुरेश्वरस्थित दशरथ रंगशालामा बुधबार साँझ आयोजित एक कार्यक्रमबीच राष्ट्रपति पौडेलले प्रतियोगिताको उद्घाटन गरेका हुन्।

राष्ट्रपति पौडेलले ओलम्पिक टर्च प्रज्ज्वलन गरी प्रतियोगिताको औपचारिक उद्घाटन गरेका हुन्। त्यसपछि राष्ट्रपति पौडेलले सो टर्च ओलम्पियन ब्याडमिन्टनका प्रिन्स दाहाललाई हस्तान्तरण गरेका थिए। प्रिन्ससहित ओलम्पियन एथलेटिक्सकी सरस्वती भट्टराई, ओलम्पियन भारोत्तोलनका कमलबहादुर अधिकारी र ओलम्पियन एथलेटिक्सकी सन्तोषी श्रेष्ठले पालैपालो टर्चलाई ट्रयाकमा परिक्रमा गराएका थिए।