प्रतिनिधिसभा विघटनको विपक्षमा प्रमुख तीन दल, रास्वपाद्वारा सर्तसहित समर्थन

काठमाडौँ । प्रतिनिधिसभा विघटनको निर्णयविरुद्ध नेपाली कांग्रेस, नेकपा एमाले र माओवादी केन्द्रले असहमति जनाएका छन् भने राष्ट्रिय स्वतन्त्र पार्टी (रास्वपा) ले सशर्त समर्थन गर्ने घोषणा गरेको छ ।

रास्वपाले मुलुकलाई कठिन संक्रमणकालबाट पार लगाउन प्रथम महिला प्रधानमन्त्री सुशीला कार्कीको नेतृत्वमा बनेको अन्तरिम सरकारलाई समर्थन गर्ने भए पनि आफ्ना घोषित लक्ष्यहरू पूरा नभए प्रतिरोध गर्ने चेतावनी दिएको छ । महामन्त्री कविन्द्र बुर्लाकोटीद्वारा जारी विज्ञप्तिमा पार्टीले भ्रष्टाचारविरुद्ध निरन्तर सङ्घर्ष गर्ने आफ्नो अडान दोहोर्‍याउँदै अन्तरिम सरकारसँग निर्वाचन सफलतापूर्वक सम्पन्न गर्न, शान्तिपूर्ण सत्ता हस्तान्तरण, लोकतान्त्रिक अधिकार सुनिश्चितता, सुशासन, आर्थिक सुधार र पुनर्निर्माणमा उल्लेखनीय प्रगति गर्ने अपेक्षा राखेको छ ।