५६ प्रतिशत खेतीयोग्य जमिनमा सिँचाइ सुविधा अभाव

मुलुकमा सिँचाइ सुविधाको विस्तार क्रमशः बढ्दै गए पनि अझै आधाभन्दा बढी खेतीयोग्य जमिन सिँचाइ सुविधाको पहुँच बाहिर रहेको तथ्यांकले देखाएको छ । ऊर्जा जलस्रोत तथा सिँचाइ मन्त्रालयका अनुसार ४४.६३ प्रतिशत जमिनमा सिँचाइ सुविधा विस्तार भएको छ । करिब ५६ प्रतिशत खेतीयोग्य जमिनमा सिँचाइ सुविधा पुग्न सकेको छैन । सिँचाइ सुविधा नभएका ठाउँमा आकासे पानीको भर पर्नुपर्ने अवस्था छ।

कृषि उत्पादन वृद्धि, खाद्य सुरक्षा र किसानको आय वृद्धिका लागि सिँचाइ आधारभूत पूर्वाधार मानिए पनि देशको कुल खेतीयोग्य जमिनको ठूलो हिस्सामा सिँचाइ सुविधाबाट बञ्चित रहेको छ । मुलुकको कुल कृषि योग्य जमिन ३५ लाख ५७ हजार सात सय ६४ हेक्टरमध्ये फागुनसम्म ४४.६३ प्रतिशत जमिनमा मात्र सिँचाइ सुविधा विस्तार भएको सिँचाइ मन्त्रालयले जनाएको छ।