महिला कर्मचारी अभावले बहिरा छात्रा आवासमा भर्ना रोकिए

सप्तरीको राजविराज नगरपालिका–६ मा रहेको बहिरा बालक विद्यालयमा महिला कर्मचारीको अभावका कारण बहिरा छात्राहरू अध्ययनबाट वञ्चित भएका छन् ।

२० जना बहिरा बालबालिका अध्ययनरत यस विद्यालयमा बालविकासदेखि कक्षा ६ सम्म पठनपाठन हुँदै आएको छ । विद्यालयमा एक जना कार्यालय सहयोगीसहित चार जना शिक्षक–शिक्षिका कार्यरत छन् । तर राति आवासमा बस्ने महिला कर्मचारीको अभावका कारण छात्राहरू भर्ना भएर पढ्न नसक्ने अवस्था रहेको विद्यालयकी प्रधानाध्यापक चाँदनी यादवले बताउनुभयो ।

उहाँले भन्नुभयो, “विद्यालयमा एक जना पुरुष कार्यालय सहयोगी हुनुहुन्छ, तर राति बस्ने महिला कर्मचारीको व्यवस्था नभएकाले विभिन्न पालिकाबाट आउने बहिरा छात्राहरू आवासमा बस्न नसक्दा पढाइबाट वञ्चित हुनुपरेको छ ।”

छ जना छात्राका अभिभावकले यस विद्यालयमा भर्नाका लागि पटक–पटक सम्पर्क गरे पनि आश्वासनबाहेक अन्य प्रगति हुन नसकेको उहाँले बताउनुभयो । उहाँका अनुसार टाढाटाढाबाट आउने विद्यार्थीका लागि पढाइसँगै आवासको व्यवस्था अनिवार्य हुन्छ, तर महिला जनशक्ति नहुँदा समस्या भएको हो ।

यस विषयमा राजविराज नगरपालिकालाई पटक–पटक जानकारी गराई महिला कर्मचारी व्यवस्थापनका लागि आग्रह गरिए पनि सुनुवाइ नभएको उहाँले बताउनुभयो । यता, राजविराज नगरपालिकाका नगर प्रमुख इसरत परविनले यस विषयमा आफूलाई अहिलेसम्म जानकारी नआएको बताउनुभएको छ ।