आफ्नै आमाका लागि बोझ बनेकी शिशु हुर्काउन सयौं हुरुक्क

भक्तपुर : भक्तपुरमा जेठ ६ गते बिहानै सालनालसहित फालिएकी शिशु फेला परिन्। मध्यपुर थिमि–३, गठ्ठाघरस्थित नमुना बस्तीमा सालनालसहित शिशु फेला परेको खबरले समाजमा भावनात्मक तरंग फैलियो। एकातिर जन्मनेबित्तिकै फालिनु परेको शिशुको नियतिलाई लिएर समाज चिन्तित भयो भने अर्कोतिर तिनै शिशुलाई आफ्नो काखमा राखेर हुर्काउन हुरुक्क हुने मानिसहरू पनि देखा परे।

पोखराकी पूजा मगर (नाम परिवर्तन) चारपटक गर्भ खेर गएको र चिकित्सकले बच्चा जन्माउन नसक्ने बताएपछि विक्षिप्त थिइन्। सालनालसहित फालिएकी शिशुको खबरले उनको मातृत्व भक्कानियो। उनी शिशुलाई आफ्नो सन्तानको पहिचान र माया बाँड्न भावुक भएकी छन्।