प्रतिमामार्फत फेरि फर्किए हरिप्रसाद रिमाल हरिहर शर्मासँगै गायक र पत्रकार सम्मानित

नेपाली रंगमञ्च, रेडियो नाटक, संगीत र अभिनयका विशिष्ट व्यक्तित्व स्व. हरिप्रसाद रिमालको १०२ औ जन्मजयन्ती विशेष कार्यक्रमका साथ मनाइएको छ।

हरिप्रसाद कल्याणी रिमाल नाट्यसंगीत प्रतिष्ठानको आयोजनामा शुक्रवार राजधानीमा आयोजित कार्यक्रममा रिमालको स्मृतिमा उनको अर्धकदको प्रतिमा अनावरण गर्नुका साथै कला, संगीत र सञ्चार क्षेत्रका विभिन्न व्यक्तित्वलाई सम्मान तथा पुरस्कार प्रदान गरिएको छ। मध्य वानेश्वरस्थित रिमालकै निवासमा स्थापना गरिएको प्रतिमा कार्यक्रमका सभापति तथा प्रतिष्ठानका अध्यक्ष प्रा. डा. वासुदेव त्रिपाठी, संस्थापक संरक्षक कल्याणी रिमाल, सदस्य सचिव सम्राट सापकोटा, प्रमुख अतिथि नेपाल संगीत तथा नाट्य प्रज्ञा प्रतिष्ठानका कुलपति ब्रजेश खनाललगायतले संयुक्त रूपमा अनावरण गरेका हुन्। प्रतिमा लयप्रसाद मैनालीले निर्माण गरेका हुन्।