बागमती नदीले सतर्कता तह पार गर्‍यो, सोमबार बिहानसम्म उच्च सावधानी अपनाउन आग्रह

काठमाडौंस्थित बागमती नदीको गौरीघाट जलमापन केन्द्रमा नदीको बहाव सतर्कता तहभन्दा माथि पुगेको भन्दै जल तथा मौसम विज्ञान विभागले नदी तटीय तथा डुबान भइरहने क्षेत्रका बासिन्दालाई सोमबार बिहानसम्म उच्च सतर्कता अपनाउन आग्रह गरेको छ।

विभागका अनुसार गौरीघाटमा बागमती नदीको पानीको सतह २.४१ मिटर पुगेको छ। उक्त केन्द्रमा नदीको २.१ मिटर पानीको सतहलाई सतर्कता तह मानिन्छ। हाल नदीको बहाव निरन्तर बढ्दो क्रममा रहेकाले तटीय तथा डुबानको जोखिम भएका क्षेत्रमा विशेष सावधानी अपनाउन विभागले अनुरोध गरेको छ।