भारतलाई पछि पार्दै इङ्गल्यान्ड बन्यो क्रिकेट विश्व वरीयताको नम्बर वान

लन्डन – श्रीलंकाविरुद्धको तेस्रो तथा अन्तिम टी–२० अन्तर्राष्ट्रिय क्रिकेटमा ८ विकेटको एकपक्षीय जित निकाल्दै घरेलु टोली इङ्गल्यान्डले शृंखला ३–० ले ‘क्लीन स्विप’ गरेको छ। ओल्ड ट्राफोर्डमा प्राप्त जितसँगै इङ्गल्यान्ड भारतलाई पछि पार्दै अन्तर्राष्ट्रिय क्रिकेट परिषद (आईसीसी) को टी–२० विश्व वरीयताको शीर्ष स्थानमा उक्लिएको छ।

जितका लागि पाएको १२५ रनको सामान्य लक्ष्य इङ्गल्यान्डले मात्र ९.४ ओभरमा २ विकेट गुमाएर पूरा गर्‍यो। घरेलु मैदानमा बल बाँकी रहने हिसाबले इङ्गल्यान्डले टी–२० मा हात पारेको यो अहिलेसम्मकै ठूलो जित हो। ६२ बल बाँकी छँदै लक्ष्य भेट्याउने क्रममा जोस बट्लरले ३२ बलमा ६२ रनको अविजित अर्धशतकीय पारी खेले। कप्तान ह्यारी ब्रुकले २१ बलमा ३३ रनको योगदान दिए। दोस्रो विकेटका लागि बट्लर र ब्रुकबीच ८५ रनको साझेदारी भएको थियो।