राजस्व संकलनमा मात्र सफलता निर्भर हुँदैन

चालू आर्थिक वर्षको पहिलो दुई महिनाको सरकारी वित्तीय अवस्थाले पुरानै विरोधाभास स्थितिलाई दोहो¥याएको छ । राजस्व उठाउने क्षमता बढ्दै गएको छ । तर, विकास बजेट खर्च गर्ने क्षमता उस्तै कमजोर छ । साउन र भदौमा राजस्व संकलन अघिल्लो वर्षको तुलनामा १६.३ प्रतिशतले बढेको छ । यो सकारात्मक संकेत हो । कर प्रशासन सुधार, करको दायरा विस्तार र डिजिटल प्रणालीको प्रयोगले राजस्व परिचालनमा सुधार ल्याउन थालेको भन्ने संकेत गर्दछ ।

सरकारको वित्तीय सफलता राजस्वको अंक बढ्नुमा मात्र निर्भर हुँदैन । नागरिकबाट उठाइएको स्रोत कहाँ र कसरी खर्च हुन्छ भन्ने प्रश्न अझ महत्वपूर्ण हो । दुई महिनामा सरकारको कुल खर्च करिब २ खर्ब रुपियाँ पुगेको छ, जुन कुल प्राप्तिभन्दा झन्डै ९ अर्ब ७३ करोड बढी हो । अझ चिन्ताजनक पक्ष खर्चको संरचना हो । विकास निर्माणसँग जोडिएको पुँजीगत खर्च जम्मा ७ अर्ब ६६ करोड रुपियाँमा सीमित छ, जबकि चालू खर्च र वित्तीय व्यवस्थापनमा ठूलो रकम खर्च भएको छ । यसले सरकार खर्च गरिरहेको छ, तर विकास गरिरहेको छ त ? भन्ने एउटा गम्भीर प्रश्न जन्माउँछ ।