भारतलाई ७ वर्षपछि साफ महिला च्याम्पियनसिपको उपाधि

काठमाडौं : साफ महिला च्याम्पियनसिप २०२६ को उपाधि घरेलु टिम भारतले जितेको छ। गोवास्थित जवाहरलाल नेहरु स्टेडियममा भारतले साविक विजेता बंगलादेशलाई ३-१ ले पराजित गर्दै उपाधि जितेको हो।

भारतले ७ वर्षपछि साफ महिला च्याम्पियनसिपको उपाधि जितेको हो। सन् २०१०, २०१२, २०१४, २०१६ र २०१९ मा लगातार पाँच पटक उपाधि जितेको भारतले त्यसपछि भने उपाधि जित्न सकेको थिएन।

खेलको ४२ औं मिनेटमा पियारी छाछाले गोल गर्दै भारतलाई अग्रता दिलाएकी थिइन्। जवाफमा पहिलो हाफको थप गरिएको दोस्रो मिनेटमा रितु पूर्ना चक्माले बंगलादेशका लागि बराबरी गोल फर्काइन्।

पहिलो हाफ १-१ बराबरीमा सकिँदा दोस्रो हाफमा भारतले २ गोल थप्दै उपाधिमा आफ्नो नाम दर्ता गरेको हो। खेलको ४६ औं मिनेटमा सानफिदा नोङरुमले भारतका लागि दोस्रो गोल गरिन्। खेलको ८२ औं मिनेटमा लिन्डा कोमले गोल गर्दै भारतलाई ७ वर्षपछि साफ महिला च्याम्पियनसिपको उपाधि सुनिश्चित गराएकी हुन्।

भारतसँग फाइनलमा पराजित भएको बंगलादेशले सन् २०२२ र सन् २०२४ मा लगातार दुईपटक उपाधि जितेको थियो।